Кансультацыi: +375 (17) 272 93 27
Прыём заявак: +375 (17) 272 98 79
Камерцыйнае выкарыстанне ІС: +375 (17) 294 43 18
17.04.2020

Штогод 26 красавіка ўвесь свет адзначае Міжнародны дзень інтэлектуальнай уласнасці, які дазваляе расказаць шырокай грамадскасці пра тое, як правы інтэлектуальнай уласнасці (ІС) спрыяюць развіццю інавацый і творчасці.

26 красавіка стаў Міжнародным днём інтэлектуальнай уласнасці па рашэнні Генеральнай Асамблеі Сусветнай арганізацыі інтэлектуальнай уласнасці (САІУ).

САІУ, у сваю чаргу, з'яўляецца найстарэйшай міжнароднай арганізацыяй у галіне аховы інтэлектуальнай уласнасці. Фактычна яна ўтварылася на дыпламатычнай канферэнцыі ў 1893 годзе. У 1967 годзе ў Стакгольме была падпісана Канвенцыя, якая заснавала САІУ. Штаб-кватэра размясцілася ў Жэневе (Швейцарыя). У 1974 годзе САІУ стала спецыялізаванай установай ААН.

У цяперашні час членамі САІУ з'яўляюцца 193 дзяржавы. Гэта больш за 90 % краін свету.

Рэспубліка Беларусь стала членам САІУ 26 красавіка 1970 года. Прававая аснова ўзаемадзеяння нашай дзяржавы з міжнароднай арганізацыяй была закладзена ў снежні 2000 года падпісаннем Праграмы супрацоўніцтва паміж Урадам Рэспублікі Беларусь і САІУ.

У 2003 і 2007 гадах адбыліся сустрэчы Прэзідэнта Рэспублікі Беларусь з Генеральным дырэктарам САІУ. К. Ідрысам (у рамках яго афіцыйных візітаў у Рэспубліку Беларусь), вынікам якіх стала пашырэнне супрацоўніцтва з гэтай арганізацыяй.

На сённяшні дзень супрацоўніцтва з САІУ рэгламентуецца таксама Мемарандумам аб узаемаразуменні паміж Урадам Рэспублікі Беларусь і САІУ, Пратаколам аб супрацоўніцтве паміж САІУ і Нацыянальным цэнтрам інтэлектуальнай уласнасці (НЦІУ) па падрыхтоўцы кадраў у галіне аховы інтэлектуальнай уласнасці ў Рэспубліцы Беларусь, а таксама Сумеснай дэкларацыяй аб дзейнасці па ўмацаванню сістэмы інтэлектуальнай уласнасці і развіццю інавацый у Рэспубліцы Беларусь.

3-5 чэрвеня 2019 года адбыўся афіцыйны візіт у Рэспубліку Беларусь Генеральнага дырэктара САІУ спадара Фрэнсіса Гары, які неаднаразова станоўча ацэньваў намаганні Рэспублікі Беларусь па развіцці нацыянальнай сістэмы інтэлектуальнай уласнасці і яе дзейнасць у гэтай сферы на міжнародным узроўні.

Мерапрыемствы, прысвечаныя святкаванню Міжнароднага дня інтэлектуальнай уласнасці, праводзяцца ў Беларусі штогод у фармаце семінараў, форумаў і канферэнцый.

І ў гэтым годзе ў межах тыдня інтэлектуальнай уласнасці ў НЦІУ 22 красавіка адбудзецца вэбінар па актуальных пытаннях развіцця сістэмы інтэлектуальнай уласнасці. З улікам неспрыяльнай эпідэміялагічнай сітуацыі, якая склалася на сённяшні дзень, НЦІУ было прынята рашэнне правесці мерапрыемства ў фармаце анлайн-канферэнцыі – вэбінара.

Акрамя таго, 23 красавіка эксперты НЦІУ прымуць удзел у круглым стале на тэму «Удасканаленне палажэнняў Грамадзянскага кодэкса Рэспублікі Беларусь аб інтэлектуальнай уласнасці», што арганізуецца Пастаяннай камісіяй Савета Рэспублікі Нацыянальнага сходу Рэспублікі Беларусь па заканадаўству і дзяржаўнаму будаўніцтву, які таксама будзе праведзены ў анлайн-рэжыме.

У 2020 годзе кампанія САІУ ў гонар Міжнароднага дня інтэлектуальнай уласнасці прысвечана ключавой ролі інавацый і інтэлектуальнай уласнасці ў забеспячэнні «зялёнай» будучыні.

Пераход да «зялёнай» эканомікі на нацыянальным узроўні павінен ажыццяўляцца з улікам сацыяльна-эканамічных, экалагічных, культурных і іншых асаблівасцяў кожнай з краін. Інтэлектуальная ўласнасць з'яўляецца адным з ключавых інструментаў у рэалізацыі ідэй «зялёнай будучыні». Менавіта вынаходства, прамысловыя ўзоры, таварныя знакі, творы навукі, літаратуры і мастацтва і іншыя аб'екты інтэлектуальнай уласнасці, у якіх ўвасабляюцца ідэі чалавечага генія, спрыяюць прасоўванню інавацыйных рашэнняў, новых высокатэхналагічных і якасных тавараў, развіццю музычнай індустрыі, мастацкай творчасці і тым самым вызначаюць аблічча навакольнага свету, робяць наша жыццё сучасным і разнастайным.

Вверх