У Нацыянальнай бібліятэцы пройдзе выстава ўнікальнай прадукцыі рэгіёнаў Беларусі

27 снежня 2023 г. у 12:30 у Нацыянальнай бібліятэцы Беларусі адбудзецца камандны залік і цырымонія ўзнагароджання пераможцаў II Міжнароднага конкурсу «Адкрываючы свет інтэлектуальнай уласнасці. 2023».

Арганізатарамі конкурсу выступілі Дзяржаўны камітэт па навуцы і тэхналогіях Рэспублікі Беларусь, Міністэрства адукацыі Рэспублікі Беларусь, Нацыянальны цэнтр інтэлектуальнай уласнасці (НЦІУ), Еўразійскае патэнтнае ведамства, Савет маладых навукоўцаў НЦІУ, таварыства з абмежаванай адказнасцю «Адукацыйны цэнтр праграмавання і высокіх тэхналогій».

Конкурс арыентаваны на маладых людзей ва ўзросце ад 13 да 19 гадоў і складаўся з 4 этапаў. У бягучым годзе ў ім прынялі ўдзел больш за 1300 навучэнцаў устаноў агульнай сярэдняй і вышэйшай адукацыі Рэспублікі Беларусь, замежных дзяржаў. Лекцыі конкурсу паглядзелі на YouTube-канале НЦІУ сумарна больш за 8,6 тысячы аўтарызаваных карыстальнікаў.

Пераможцам конкурсу будуць уручаны дыпломы і спецыяльныя прызы (ноўтбукі, планшэты, разумныя гадзіннікі, сертыфікаты на навучальныя курсы па праграмаванні і вэб-дызайне ў IT-Academy і многае іншае).

Таксама ў рамках мерапрыемства будзе праходзіць спецыяльная выстава канцэпцый прасоўвання канкрэтных прадуктаў з 16 рэгіёнаў рэспублікі. Дадзеныя прадукты валодаюць унікальнымі характарыстыкамі, абумоўленымі геаграфічным паходжаннем прадуктаў, і спрыяюць фармаванню станоўчага іміджу рэгіёну, у якім яны вырабляюцца. У дачыненні да такіх прадуктаў патэнцыйна можа быць атрымана прававая ахова геаграфічных указанняў.

Выстава будзе адкрыта для наведвання з 11.00 да 12.30.

Больш навін аб інтэлектуальнай уласнасці – у нашых сацсетках (Facebook, Instagram, Telegram).

Фота: НЦІУ