НЦІУ правёў шэраг сустрэч з кіраўніцтвам САІУ

У рамках работы 64-й серыі пасяджэнняў Асамблей дзяржаў – членаў Сусветнай арганізацыі інтэлектуальнай уласнасці (САІУ) у Жэневе (Швейцарыя) беларуская дэлегацыя на чале з генеральным дырэктарам Нацыянальнага цэнтра інтэлектуальнай уласнасці (НЦІУ) Уладзімірам Рабаволавым правяла шэраг сустрэч з кіраўніцтвам САІУ.

У ходзе сустрэчы з Генеральным дырэктарам САІУ Дарэнам Тангам кіраўнік НЦІУ адзначыў, што Беларусь імкнецца да фарміравання моцнай і збалансаванай сістэмы інтэлектуальнай уласнасці, якая адпавядае міжнародным стандартам і інтарэсам нацыянальных заяўнікаў. 

«Сёння як ніколі важна забяспечыць доступ да інструментаў інтэлектуальнай уласнасці на ўсіх узроўнях. Урад Рэспублікі Беларусь, у сваю чаргу, прызнае значнасць інтэграцыі інструментаў інтэлектуальнай уласнасці ў працу ўсіх сектараў эканомікі», – падкрэсліў ён.

Таксама адбылася сустрэча з намеснікам Генеральнага дырэктара САІУ Біньін Ван, падчас якой бакі абмеркавалі парадак дзеянняў па далучэнні Рэспублікі Беларусь да Лісабонскай сістэмы па ахове найменняў месцаў паходжання і геаграфічных указанняў.

Акрамя таго, генеральны дырэктар НЦІУ правёў сустрэчу з памочнікам Генеральнага дырэктара САІУ Марко Алеманам. М. Алеман адзначыў актыўны ўдзел Рэспублікі Беларусь у рэалізацыі сумеснага праекта САІУ і Еўразійскага патэнтнага ведамства па нарошчванні патэнцыялу тэхнапаркаў у Еўразійскім рэгіёне. Бакі абмеркавалі поспехі і перспектывы далейшага развіцця ў Беларусі сеткі цэнтраў падтрымкі тэхналогій і інавацый, а таксама вызначылі крокі па ўключэнні краіны ў Праграму садзейнічання вынаходнікам. Дасягнута дамоўленасць аб удзеле ў праекце "Інструмент дыягностыкі ІС САІУ".

Пытанні выканання сумеснага плана мерапрыемстваў НЦІУ і САІУ на 2023 г., а таксама магчымыя праекты на 2024 г. сталі прадметам абмеркавання ў ходзе сустрэчы з дырэктарам аддзела па краінах з пераходнай эканомікай і развітымі краінамі САІУ (TDC) Хабіпам Асанам. Па выніках перамоў беларускі бок сумесна з экспертамі САІУ ў бліжэйшы час падрыхтуе шэраг прапаноў па канкрэтных праектах для іх рэалізацыі ў наступным годзе.

Больш навін аб інтэлектуальнай уласнасці – у нашых сацсетках (Facebook, Instagram, Telegram).

Фота: НЦІУ