У міжнародных навуковых колах вучоны Сяргей Уладзіміравіч Абламейка шырока вядомы як буйны спецыяліст у галіне інфарматыкі, інфармацыйных тэхналогій, апрацоўкі выяў і распазнавання вобразаў.
Нарадзіўся 24 верасня 1956 г. у пасёлку Воранава Гродзенскай вобласці ў сям’і інжынера-землеўпарадчыка. Скончыў механіка-матэматычны факультэт Беларускага дзяржаўнага ўніверсітэта імя У. І. Леніна (цяпер БДУ). Навуковай працай пачаў займацца ў Інстытуце тэхнічнай кібернетыкі Акадэміі навук БССР.
Пасля заканчэння вучобы з 1978 па 2008 г. працаваў у Аб’яднаным інстытуце праблем інфарматыкі НАН Беларусі, прайшоўшы шлях ад стажора-даследчыка да генеральнага дырэктара інстытута.
У якасці вучонага Сяргей Уладзіміравіч даследаваў пытанні стварэння аўтаматычнай апрацоўкі картаграфічных выяў. Вучоным былі распрацаваны метады папярэдняй апрацоўкі растравай графічнай інфармацыі і пабудовы лічбавай мадэлі графічнага дакумента па яго растравым уяўленні, а таксама створана спецыяльнае праграмнае забеспячэнне. Вынікі даследаванняў ляглі ў аснову дысертацыі, якую ён абараніў у 1984 г. Гэта тэма таксама склала аснову доктарскай дысертацыі (1990). Распрацаваныя ім сумесна з вучнямі асновы тэорыі, метады, алгарытмы і сістэмы апрацоўкі і распазнавання розных класаў графічных выяў атрымалі шырокую міжнародную вядомасць і прызнанне і выкарыстоўваюцца ў шматлікіх галінах народнай гаспадаркі Беларусі і іншых краін.
У 1992 г. С. Абламейку прысвоена вучонае званне прафесара. У 1998 г. за вялікі ўклад у развіццё тэорыі апрацоўкі выяў быў абраны галоўным членам Міжнароднай асацыяцыі па распазнаванні вобразаў (IAPR). У 2004 г. абраны членам-карэспандэнтам НАН Беларусі і прызначаны членам яе Прэзідыума. У 2005-2012 гг. быў акадэмікам-сакратаром Аддзялення фізікі, матэматыкі і інфарматыкі НАН Беларусі.
На працягу многіх гадоў Сяргей Уладзіміравіч працаваў прафесарам кафедры матэматычнага забеспячэння АСК факультэта прыкладной матэматыкі і інфарматыкі БДУ, выкладаў у Беларускім дзяржаўным універсітэце інфарматыкі і радыёэлектронікі. У 2008 г. прызначаны рэктарам БДУ. У 2009 г. абраны акадэмікам НАН Беларусі.
Вучоны з’яўляўся навуковым кіраўніком праграм Саюзнай дзяржавы Расіі і Беларусі «Космас-БР» і «СКІФ» і ўнёс вялікі ўклад у развіццё даследаванняў па касмічнай тэматыцы ў Беларусі і стварэнне найбольш моцных на тэрыторыі СНД суперкамп’ютараў.
Сяргей Уладзіміравіч Абламейка з’яўляецца аўтарам больш за 650 навуковых прац, у тым ліку 25 кніг, 15 манаграфій. Кнігі вучонага выдаюцца ў Вялікабрытаніі, ЗША, Нідэрландах, Польшчы і інш. Пад яго кіраўніцтвам і пры яго кансультаванні абаронена 12 кандыдацкіх дысертацый і 3 доктарскія дысертацыі.
Узнагароджаны бронзавым медалём Норберта Вінера Міжнароднай акадэміі навук інфармацыі, інфармацыйных працэсаў і тэхналогій (2003), медалём Францыска Скарыны (2007), залатым медалём Ю. Гагарына Федэрацыі касманаўтыкі Расіі (2007), ордэнам К. Э. Цыялкоўскага Федэрацыі касманаўтыкі Расіі (2015) і інш. Лаўрэат Дзяржаўнай прэміі Беларусі ў галіне навукі і тэхнікі (2002), заслужаны дзеяч навукі Рэспублікі Беларусь (2017).
Вучонаму прысвоена званне ганаровага прафесара Гродзенскага дзяржаўнага ўніверсітэта імя Я. Купалы, Маскоўскага дзяржаўнага ўніверсітэта імя М. В. Ламаносава, Далянскага політэхнічнага ўніверсітэта (Кітай), Універсітэта Бінь Зыёнг (В’етнам) і інш.
Па матэрыялах Нацыянальнай бібліятэкі Беларусі
Больше новостей об интеллектуальной собственности – в наших соцсетях (Instagram, Telegram).