У Мінску праходзіць Летняя школа САІУ

8 июня 2026

Падзеі

З 1 па 5 чэрвеня 2026 г. адбыўся першы тыдзень навучання ў Летняй школе Сусветнай арганізацыі інтэлектуальнай уласнасці (Летняя школа САІУ).

Навучанне арганізавана Сусветнай арганізацыяй інтэлектуальнай уласнасці (САІУ) сумесна з Нацыянальным цэнтрам інтэлектуальнай уласнасці (НЦІУ), Дзяржаўным камітэтам па навуцы і тэхналогіях Рэспублікі Беларусь, Нацыянальнай бібліятэкай Беларусі.

Слухачы азнаёміліся з наступнымі тэмамі:

• патэнтнае права ў лічбавую эпоху – уплыў новых тэхналогій, перавагі адзінай еўразійскай сістэмы патэнтавання, патэнтная інфармацыя і яе практычнае прымяненне;
• аўтарскае права і сумежныя правы – трансфармацыя ў лічбавым асяроддзі, калектыўнае кіраванне правамі, адкрытыя ліцэнзіі і «сірочыя» творы;
• таварныя знакі і геаграфічныя ўказанні – стратэгіі кіравання партфелем, практыка Суда па інтэлектуальных правах, ахова ў ЕАЭС, прасоўванне беларускіх брэндаў;
• актуальная практыка і перспектывы прававой аховы прамысловых узораў і гатункаў раслін;
• даменныя імёны і альтэрнатыўнае вырашэнне спрэчак.

Асаблівая ўвага нададзена такім практычным пытанням, як распрацоўка мадэлі вітрыны даных па інтэлектуальнай уласнасці, выкананне НДР у інавацыйнай дзейнасці і прававая ахова сакрэтаў вытворчасці.

У рамках навучання адбыліся практычныя майстар-класы па складанні заявак:

• на атрыманне патэнта на вынаходства;
• на дэпаніраванне камп’ютарнай праграмы;
• на рэгістрацыю таварнага знака;
• на рэгістрацыю геаграфічнага ўказання.

Заняткі правялі вядучыя эксперты з САІУ, НЦІУ, Вярхоўнага Суда Рэспублікі Беларусь, Еўразійскай патэнтнай арганізацыі, Еўразійскай эканамічнай камісіі, Дзяржаўнай інспекцыі па выпрабаванні і ахове сартоў раслін Рэспублікі Беларусь, Інстытута сістэмных даследаванняў у АПК Нацыянальнай акадэміі навук Беларусі, Беларускага дзяржаўнага ўніверсітэта, Федэральнага інстытута прамысловай уласнасці, Навукова-адукацыйнага цэнтра інтэлектуальнай уласнасці і лічбавай эканомікі Digital IP.

Летняя школа САІУ дае ўнікальную магчымасць атрымаць актуальныя веды ў сферы інтэлектуальнай уласнасці ад вядучых экспертаў і практыкаў, а таксама выпрацаваць навыкі, неабходныя для эфектыўнай работы ў галіне аховы і камерцыялізацыі аб'ектаў інтэлектуальнай уласнасці.

Больш навін аб інтэлектуальнай уласнасці – у нашых сацсетках (Facebook, Instagram, Telegram, VK).