Новыя ідэі для будучыні: юныя наватары атрымалі патэнты на прамысловы ўзор і карысную мадэль

24 июня 2026

Падзеі

24 чэрвеня 2026 г. напярэдадні Дня вынаходніка і рацыяналізатара ва ўрачыстай абстаноўцы генеральны дырэктар Нацыянальнага цэнтра інтэлектуальнай уласнасці Аляксей Курман уручыў патэнты Рэспублікі Беларусь юным вынаходнікам і наватарам.

17-гадовыя Карына Горбач і Сабрына Брэль распрацавалі попсокет з поласцю для рэпелентаў. Трымальнік для тэлефона абараняе ўладальніка ад насякомых дзякуючы рэчыву, убудаванаму ў матэрыял корпуса. Рэпелент паступова выдзяляецца, ствараючы ахоўны бар'ер. Карыстальніку дастаткова трымаць тэлефон пры сабе. Попсокет зручна мацуецца да прылады, забяспечваючы бяспеку на прагулках, пікніках і дачы. Заяўка на рэгістрацыю была пададзена 24 сакавіка 2026 г., а ўжо 20 чэрвеня 2026 г. зарэгістраваны патэнт на прамысловы ўзор № 5459.

С. Брэль і К. Горбач з'яўляюцца фіналістамі праекта «100 ідэй для Беларусі – 2026», пераможцамі розных канферэнцый і конкурсаў («Школьны трэк. Вялікая разведка», «Нашчадкі Ламаносава» і інш.).

8-гадовы мінчанін Сямён Языкоў распрацаваў карысную мадэль – «Аб'ёмны гербарый». Дзякуючы асаблівай сушцы (уключаючы вакумную сушку і сілікагель) і заліванні празрыстай УФ-смалой, узоры раслін можна вывучаць з усіх бакоў у любую пару года. Такія 3D-аб'екты ідэальна падыходзяць для кабінетаў біялогіі і геаграфіі, лабараторных работ, школьных урокаў, факультатываў і майстар-класаў. Заяўка на рэгістрацыю была пададзена 31 сакавіка 2026 г., а 20 чэрвеня 2026 г. зарэгістраваны патэнт на карысную мадэль № 13997.

С. Языкоў з'яўляецца лаўрэатам і пераможцам розных конкурсаў («Навука ў фатаграфіях», «Пчолка» і інш.). Ажыццяўляе апеку над жывёламі і птушкамі ў Мінскім заапарку.

Сааўтарам распрацовак, а таксама куратарам з'яўляецца Алена Флюрык, загадчык кафедры тэхналогіі неарганічных рэчываў і агульнай хімічнай тэхналогіі Беларускага дзяржаўнага тэхналагічнага ўніверсітэта, кандыдат біялагічных навук, дацэнт.

Нацыянальны цэнтр інтэлектуальнай уласнасці віншуе юных наватараў і жадае далейшых поспехаў у вынаходніцкай справе!

Больш навін аб інтэлектуальнай уласнасці – у нашых сацсетках (Facebook, Instagram, Telegram, VK).