Падпісаны Закон аб абмежаванні выключных правоў на аб'екты інтэлектуальнай уласнасці

9 января 2023

Афіцыйна

3 студзеня 2023 г. Кіраўніком дзяржавы падпісаны Закон Рэспублікі Беларусь «Аб абмежаванні выключных правоў на аб'екты інтэлектуальнай уласнасці» № 241-З (Закон).

Прыняцце Закона накіравана на стварэнне ўмоў для павышэння ўнутранай устойлівасці эканомікі, прадухілення або памяншэння крытычнага недахопу на ўнутраным рынку харчовых ці іншых тавараў, павышэння ўзроўню інфармацыйнай бяспекі, развіцця інтэлектуальнага і духоўна-маральнага патэнцыялу грамадства, забеспячэння доступу да дасягненняў сусветнай культуры і падзей сучаснага жыцця.

Закон рэгулюе адносіны, звязаныя з абмежаваннем выключных правоў на аб'екты інтэлектуальнай уласнасці, якія належаць праваўладальнікам, а таксама прадугледжвае ўстанаўленне часовай магчымасці выкарыстоўваць аб'екты інтэлектуальнай уласнасці без дазволу іх праваўладальнікаў або арганізацый па калектыўным кіраванні маёмаснымі правамі пры выкананні пэўных умоў.

Так, умовамі выкарыстання замежных камп'ютарных праграм, аўдыёвізуальных і музычных твораў, перадач арганізацый вяшчання будуць з'яўляцца:

• забарона або адсутнасць дазволу выкарыстоўваць гэтыя аб'екты на тэрыторыі Рэспублікі Беларусь;
• уключэнне праваўладальнікаў або арганізацый па калектыўным кіраванні маёмаснымі правамі ў адпаведныя пералікі праваўладальнікаў;
• выплата ўзнагароджання за выкарыстанне такіх аб'ектаў з улікам міжнародных абавязацельстваў Рэспублікі Беларусь у сферы аўтарскага права і сумежных правоў. Такое ўзнагароджанне будзе выплачвацца карыстальнікамі і залічвацца на банкаўскія рахункі патэнтнага органа для наступнай выплаты праваўладальнікам. Памеры такога ўзнагароджання будуць устанаўлівацца Урадам.

Умовамі выкарыстання іншых аб'ектаў інтэлектуальнай уласнасці, якія змяшчаюцца ў імпартных таварах, будуць з'яўляцца:

• істотная важнасць тавараў для ўнутранага рынку;
• крытычны недахоп тавараў на ўнутраным рынку альбо наяўнасць відавочнай пагрозы такога недахопу;
• уключэнне тавараў у адпаведныя пералікі тавараў.

Пералікі праваўладальнікаў і пералікі тавараў будуць весціся дзяржаўнымі органамі, якія вызначыць Урад.

Больш навін аб інтэлектуальнай уласнасці – у нашых сацсетках (Facebook, Instagram, Telegram).