Пытанне: Колькі гадоў пасля смерці замежнага аўтара будзе ахоўвацца выключнае права на яго творы ў Рэспубліцы Беларусь?

Адказ: Згодна з п. 2 арт. 20 Закона Рэспублікі Беларусь ад 17 мая 2011 г.    № 262-З «Аб аўтарскім праве і сумежных правах» (Закон аб аўтарскім праве) выключнае права на твор дзейнічае на працягу жыцця аўтара і 50 гадоў пасля яго смерці, за выключэннем выпадкаў, прадугледжаных Законам аб аўтарскім праве.

Пры гэтым згодна з п. 3 арт. 5 Закона аб аўтарскім праве прадастаўленне на тэрыторыі Рэспублікі Беларусь аховы творам у адпаведнасці з міжнароднымі дамовамі Рэспублікі Беларусь ажыццяўляецца ў дачыненні да твораў, якія не перайшлі ў грамадскі здабытак у краіне паходжання твора з прычыны заканчэння ўстаноўленага ў гэтай краіне тэрміну дзеяння аўтарскага права на гэты твор і не перайшлі ў грамадскі здабытак у Рэспубліцы Беларусь з прычыны заканчэння тэрміну дзеяння аўтарскага права на гэты твор, прадугледжанага арт. 20 Закона аб аўтарскім праве.

Такім чынам, калі ў Рэспубліцы Беларусь у адпаведнасці з міжнароднымі дамовамі ахоўваюцца творы замежных аўтараў, тэрмін такой аховы ў Рэспубліцы Беларусь складзе час жыцця аўтара і 50 гадоў пасля яго смерці (пры ўмове, што ў краіне паходжання твора тэрмін дзеяння аўтарскага права не ўстаноўлены менш названага тэрміну).

Аднак звяртаем увагу, што 19 лістапада 2024 г. ўступяць у сілу змены, унесеныя ў Грамадзянскі кодэкс Рэспублікі Беларусь у лістападзе 2023 г., і тэрмін дзеяння выключнага права на твор у Рэспубліцы Беларусь будзе павялічаны на 20 гадоў (ён будзе складаць час жыцця аўтара і 70 гадоў пасля яго смерці). Адпаведна, павялічыцца і тэрмін аховы твораў замежных аўтараў (пры ўмове, што ў краіне паходжання твора тэрмін дзеяння аўтарскага права не ўстаноўлены менш названага тэрміну).

06. 2024
Падрыхтавалі: Т.П. Цэдрык (намеснік начальніка упраўлення аўтарскага і сумежных правоў - начальнік аддзела рэгістрацыі правоў НЦІУ), Д.Х. Градоўкіна (вядучы спецыяліст аддзела рэгістрацыі правоў кіравання аўтарскага і сумежных правоў НЦІУ)