А. Курман: Беларусь прымае актыўны ўдзел у перамовах і падтрымлівае намаганні САІУ на карысць усёй сусветнай інавацыйнай супольнасці

8 ліпеня 2026 г. генеральны дырэктар Нацыянальнага цэнтра інтэлектуальнай уласнасці (НЦІУ) Аляксей Курман выступіў з агульнай заявай на 68-й серыі пасяджэнняў Асамблей дзяржаў – членаў Сусветнай арганізацыі інтэлектуальнай уласнасці (САІУ).

У сваім выступленні А. Курман адзначыў, што ў эпоху імклівых тэхналагічных трансфармацый інтэлектуальная ўласнасць павінна выступаць магутным драйверам навукова-тэхнічнага прагрэсу, устойлівага эканамічнага росту і дасягнення Мэт устойлівага развіцця ААН:

– На нацыянальным узроўні мы дэманструем высокую дынаміку развіцця нацыянальнай сістэмы інтэлектуальнай уласнасці. За мінулы перыяд усе адміністрацыйныя працэдуры НЦІУ пераведзены ў электронны фармат. Гэтая маштабная лічбавая трансфармацыя зрабіла дзяржаўныя паслугі ў сферы інтэлектуальнай уласнасці максімальна даступнымі, празрыстымі і хуткімі для карыстальнікаў.

Важным крокам стала падключэнне да службы лічбавага доступу САІУ (WIPO DAS), якое спрасціла для беларускіх і замежных заяўнікаў працэдуру прызнання прыярытэту пры трансгранічным патэнтаванні. Нацыянальная сетка цэнтраў падтрымкі тэхналогій і інавацый (ЦПТІ) інтэгравана з платформай еЦПТІ, што дае навукоўцам абароненае асяроддзе для абмену вопытам і перадавымі тэхналагічнымі ведамі з глабальнай прафесійнай супольнасцю САІУ. Акрамя таго, у цесным супрацоўніцтве з экспертамі САІУ завершаны ключавы этап укаранення тыпавой палітыкі ў галіне інтэлектуальнай уласнасці для беларускіх універсітэтаў, а ў чэрвені гэтага года ў Мінску паспяхова праведзена чарговая Летняя школа САІУ.

Таксама Аляксей Курман падкрэсліў, што сёння важна ўмацоўваць патэнцыял экспертнай супольнасці ў інтарэсах усіх карыстальнікаў глабальнай сістэмы інтэлектуальнай уласнасці:

– Беларуская дэлегацыя заклікае да дэпалітызацыі міжнароднага дыялогу і выказвае заклапочанасць выкарыстаннем механізмаў інтэлектуальнай уласнасці як інструмента санкцыйнага ціску. Падобныя дзеянні падрываюць асновы глабальнай патэнтнай сістэмы і парушаюць законныя правы аўтараў і заяўнікаў па ўсім свеце. Беларусь выступае за раўнапраўнае прафесійнае супрацоўніцтва на пляцоўках САІУ, свабоднае ад дыскрымінацыі, і падтрымлівае ініцыятывы арганізацыі па пашырэнні доступу да інструментаў інтэлектуальнай уласнасці для малога бізнесу, моладзі і жанчын-інаватараў.

68-я серыя пасяджэнняў Асамблей дзяржаў – членаў САІУ праходзіць з 7 па 15 ліпеня 2026 г. у Жэневе (Швейцарыя).

Больш навін аб інтэлектуальнай уласнасці – у нашых сацсетках (Telegram, Instagram, Facebook, VK).