У Жэневе прайшла 35-я сесія Пастаяннага камітэта САІУ па патэнтным праве

З 16 па 20 кастрычніка 2023 г. у Жэневе прайшла 35-я сесія Пастаяннага камітэта Сусветнай арганізацыі інтэлектуальнай уласнасці (САІУ) па патэнтным праве (ПКПП). Удзельнікі абмеркавалі дзейнасць дзяржаў па павышэнні якасці патэнтаў, механізмаў паскоранай экспертызы заявак, выкарыстання штучнага інтэлекту ў патэнтнай экспертызе.

У рамках ПКПП начальнік упраўлення прававога і кадравага забеспячэння Нацыянальнага цэнтра інтэлектуальнай уласнасці (НЦІУ) Таццяна Кавалеўская прадставіла актуальную інфармацыю:

• аб зменах патэнтнага заканадаўства Рэспублікі Беларусь, у прыватнасці аб прынятым 9 студзеня 2023 г. Законе Рэспублікі Беларусь № 243-З «Аб змяненні законаў па пытаннях прававой аховы аб'ектаў інтэлектуальнай уласнасці» і прадугледжаных ім зменах патэнтнага заканадаўства, у тым ліку ў дачыненні да прымусовых ліцэнзій;
• аб практыцы выкарыстання беларускім патэнтным ведамствам штучнага інтэлекту (ШІ) для мэт правядзення экспертызы заявак, у тым ліку для паскарэння і спрашчэння правядзення пошуку;
• аб двухступенчатай сістэме праверкі падрыхтаваных экспертам рашэнняў НЦІУ. Такая сістэма з'яўляецца аптымальнай у бягучай сітуацыі падачы ў сярэднім 350 заявак на вынаходствы ў год (што пацвярджаецца нязначнай колькасцю выпадкаў абскарджання рашэнняў НЦІУ па заяўках на вынаходствы);
• аб ажыццяўленні ў НЦІУ эфектыўнай паскоранай патэнтнай экспертызы. Нагадаем, тэрмін правядзення дадзенай экспертызы ў НЦІУ складае не больш за 12 месяцаў, а ў выпадку неабходнасці заяўнік мае магчымасць на працягу трох месяцаў пасля звароту за правядзеннем патэнтнай экспертызы атрымаць рашэнне па заяўцы (кошт такой паслугі ў дачыненні да аднаго вынаходства складае 420 беларускіх рублёў).

Па выніках абмеркавання пытанняў 35-й сесіі ПКПП дэлегацыі прызналі важнасць вывучэння пытання аб неабходнасці прымянення ШІ для класіфікацыі патэнтаў. Аднак было падкрэслена, што экспертыза заявак не можа цалкам ажыццяўляцца з дапамогай ШІ, паколькі законы краін ўтрымліваюць патрабаванні аб правядзенні ацэнкі заявак спецыялістамі ў адпаведных галінах тэхнікі, якімі ШІ не з'яўляецца.

Важна адзначыць, што наяўнасць правоў на аб'екты інтэлектуальнай уласнасці адыгрывае важную ролю ў перадачы тэхналогій. У сусветнай практыцы ўсё часцей ствараюцца і функцыянуюць біржы інтэлектуальнай уласнасці, дзе кампаніі могуць прапанаваць свае патэнты і тэхналогіі для продажу або ліцэнзавання. Гэта спрыяе развіццю інавацый і абмену ведамі паміж кампаніямі, што можа спрыяць росту эканомікі і тэхналагічнаму прагрэсу.

Таксама сакратарыят ПКПП плануе стварыць спецыяльную вэб-старонку, прысвечаную праграмам паскоранай экспертызы патэнтных ведамстваў, і будзе рэгулярна абнаўляць яе на аснове інфармацыі, атрыманай ад дзяржаў-членаў САІУ і рэгіянальных патэнтных ведамстваў.

Больш навін аб інтэлектуальнай уласнасці – у нашых сацсетках (Facebook, Instagram, Telegram).

Фота: Таццяна Кавалеўская