Падведзены вынікі міжнароднага конкурсу ў сферы інтэлектуальнай уласнасці «Адкрываючы свет інтэлектуальнай уласнасці. 2023»

У Нацыянальнай бібліятэцы Беларусі адбылося выніковае мерапрыемства, прысвечанае Міжнароднаму конкурсу ў сферы інтэлектуальнай уласнасці «Адкрываючы свет інтэлектуальнай уласнасці. 2023» (конкурс).

Конкурс праводзіўся з верасня па снежань і ўключаў чатыры этапы. Чацвёрты этап конкурсу прадугледжваў падрыхтоўку канцэпцый прасоўвання канкрэтных прадуктаў, якія валодаюць унікальнымі характарыстыкамі, абумоўленымі геаграфічным паходжаннем прадуктаў, і якія спрыяюць фармаванню станоўчага іміджу рэгіёну, у якім яны вырабляюцца. У дачыненні да такіх прадуктаў патэнцыйна можа быць атрымана прававая ахова ў якасці аб'екта інтэлектуальнай уласнасці – геаграфічнага ўказання. Прэзентацыя дадзеных канцэпцый прайшла ў рамках цырымоніі ўзнагароджання пераможцаў названага конкурсу.

Як адзначыў першы намеснік Старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі, конкурс пераследваў як выхаваўчую, так і адукацыйную мэту.

– Невыпадкова ўдзельнікамі конкурсу сталі хлопцы і дзяўчаты ва ўзросце ад 13 да 18 гадоў, – адзначыў першы намеснік. – Гэта людзі, якія вось-вось увойдуць у дарослае жыццё. Вельмі важна, каб яны ведалі нашу спадчыну, прадукцыю, якая вырабляецца на нашай зямлі. Унікальная гэтая прадукцыя тым, што яе стваралі яшчэ нашы бацькі і дзяды. Яна дайшла да нас праз шмат стагоддзяў. Важна, каб хлопцы і дзяўчаты таксама ўмелі папулярызаваць гэтую прадукцыю, каб яе ведалі ва ўсім свеце.

Дыплом 1 ступені сярод пераможцаў індывідуальнага заліку конкурсу па выніках усіх чатырох этапаў уручаны вучаніцы гімназіі № 36 г. Мінска Маргарыце Хведарук. Пераможцам конкурсу праектаў стаў навучэнец Фарынаўскай сярэдняй школы Полацкага раёна Яраслаў Канькоў з канцэпцыяй прасоўвання лячэбнай сапрапелевай гразі возера Пліса.

Акрамя таго, у рамках цырымоніі ўзнагароджання была арганізавана тэматычная выстава ўнікальнай прадукцыі, якая вырабляецца ў розных кутках Беларусі. Сярод прадстаўленай унікальнай прадукцыі: палескія журавіны (ААТ «Палескія журавіны»), ажурнае ткацтва Гарадоцкага р-на (філіял «Гарадоцкі дом рамёстваў і фальклору» ДУК «Цэнтр традыцыйнай культуры і народнай творчасці»); глыбоцкі жытні хлеб (Глыбоцкі дом рамёстваў ДУК «Глыбоцкая цэнтралізаваная клубная сістэма»); лячэбная сапрапелевая гразь возера Пліса (санаторна-курортны комплекс «Пліса»); неглюбскія ручнікі (Неглюбскі сельскі цэнтр ткацтва і гуртка ткацтва ДУА «Веткаўскі Цэнтр творчасці дзяцей і моладзі»); гальшанскі пернік (Ашмянскі філіял Гродзенскага абласнога спажывецкага таварыства); ільняны алей «Беларускі» (ААТ «Карэлічы-Лён»); рухоўскія дываны (ДУК «Старадарожскі цэнтр рамёстваў»); бабруйская яблычная пасціла, зефір (ААТ «Чырвоны харчавік» канцэрна «Белдзяржхарчпрам») і інш.

У бягучым годзе ў конкурсе прынялі ўдзел больш за 1300 навучэнцаў устаноў агульнай сярэдняй, сярэдняй спецыяльнай і вышэйшай адукацыі з Беларусі і замежных дзяржаў. Пры гэтым лекцыі, прачытаныя ў рамках конкурсу, паглядзелі на YouTube-канале НЦІУ сумарна больш за 8,6 тысячы аўтарызаваных карыстальнікаў.

Арганізатарамі конкурсу выступілі Дзяржаўны камітэт па навуцы і тэхналогіях Рэспублікі Беларусь, Міністэрства адукацыі Рэспублікі Беларусь, Нацыянальны цэнтр інтэлектуальнай уласнасці (НЦІУ), Еўразійскае патэнтнае ведамства Еўразійскай патэнтнай арганізацыі, таварыства з абмежаванай адказнасцю «Адукацыйны цэнтр праграмавання і высокіх тэхналогій» і Савет маладых навукоўцаў НЦІУ.

Больш навін аб інтэлектуальнай уласнасці – у нашых сацсетках (Facebook, Instagram, Telegram).

Фота: Алена Васіленка, Уладзімір Воўк