Алімпійскія Гульні і інтэлектуальная ўласнасць

Алімпійскія гульні – гэта ўнікальная спартыўная падзея для ўсяго свету. Яны паказваюць ўсё лепшае і ў спорце, і ў краінах і гарадах, якія іх прымаюць. Арганізацыя Алімпійскіх гульняў патрабуе вялікай працы і натхнення з боку горада-арганізатара, арганізацыйных камітэтаў Алімпійскіх і Паралімпійскіх гульняў, спартсменаў, нацыянальных алімпійскіх камітэтаў, міжнародных спартыўных федэрацый, Міжнароднага алімпійскага камітэта (МАК), афіляваных з ім арганізацый і іншых членаў алімпійскага руху.

З пункту гледжання інтэлектуальнай уласнасці (ІУ) падрыхтоўка кожных новых гульняў пачынаецца прыкладна за 10 гадоў да таго, як алімпійскі агонь пакіне Алімпію ў Грэцыі і будзе дастаўлены ў горад-арганізатар, дзе ад яго на цырымоніі адкрыцця будзе запалены агонь у алімпійскай чашы. На кожным этапе гэтага шляху адбываецца стварэнне, набыццё, перадача і ахова ІУ. Можна нават сказаць, што стратэгічнае выкарыстанне ІУ і правоў, якія ахоўваюць ўсе матэрыяльныя і нематэрыяльныя актывы, звязаныя з гульнямі, фактычна забяспечвае правядзенне Гульняў.

Працэс выбару горада-арганізатара пачынаецца з таго, што зацікаўленыя гарады і нацыянальныя алімпійскія камітэты заяўляюць аб цікавасці да правядзення Гульняў. На гэтым раннім этапе, задоўга да пачатку афіцыйнай працэдуры адбору, гарады часта рэгіструюць таварныя знакі, звязаныя з іх алімпійскімі памкненнямі. Напрыклад, ужо зарэгістраваныя таварныя знакі для Алімпійскіх гульняў у Парыжы ў 2024 г. і ў Лос-Анджэлесе ў 2028 г.

Таксама рэгіструюцца розныя даменныя імёны. Мэта заключаецца ў тым, каб захаваць неабходную анлайнавую экасістэму і не дапусціць неналежнага выкарыстання даменных імёнаў, звязаных з патэнцыйным горадам-арганізатарам (кіберсквотынгу).

На гэтым этапе працэса адбору МАК адкрывае гарадам-кандыдатам доступ да свайго аўдыёвізуальнага архіва, які ахоўваецца аўтарскім правам (Алімпійскі архіў). Гэта дапамагае ў стварэнні новых і вытворных твораў у падтрымку заяўкі, а таксама спрыяе наладжванню ўзаемадзеяння з мясцовай грамадскасцю.

Калі на сесіі МАК выбіраецца горад-арганізатар новых Алімпійскіх гульняў, усе ахоўныя ІУ актывы, створаныя ў сувязі з кандыдацкай заяўкай, становяцца часткай укладу гэтага горада ў алімпійскі рух.

Велізарную фінансавую і практычную падтрымку Алімпійскім гульням аказваюць маркетынгавыя партнёры, уключаючы кампаніі, якія ўдзельнічаюць у глабальнай алімпійскай спонсарскай праграме, і медыйныя арганізацыі, якім МАК прадастаўляе выключныя правы на трансляцыю і паказ Алімпійскіх гульняў. У абмен на падтрымку і экспертны рэсурс Алімпійскія маркетынгавыя партнёры атрымліваюць розныя выключныя правы, уключаючы сусветныя маркетынгавыя правы, правы на трансляцыю, правы на размяшчэнне гасцей мерапрыемстваў, правы на пастаўкі і іншыя спонсарскія перавагі, а таксама ліцэнзіі на выкарыстанне алімпійскіх кольцаў, Алімпійскага архіва і іншых ахоўных ІУ актываў, звязаных з Алімпійскімі гульнямі.

Важна і арганізацыя культурнай алімпіяды, паколькі Алімпійская Хартыя загадвае заахвочваць і падтрымліваць ініцыятывы па сціранні граняў паміж спортам, культурай і адукацыяй у мэтах прасоўвання алімпізму. Гэтыя мерапрыемствы праходзяць напярэдадні і падчас Алімпійскіх гульняў. Яны спрыяюць стварэнню і распаўсюджванню ахоўваемых аўтарскім правам літаратурных і мастацкіх твораў, якія адлюстроўваюць культурную ідэнтычнасць прымаючага краіны. У гэтых мерапрыемствах таксама задзейнічаны самыя розныя віды выкананняў – музычных, танцавальных, драматычных, якія ахоўваюцца з дапамогай сумежных правоў.

Правы ІУ, звязаныя з гульнямі, забяспечваюць ахову цэласнасці і ўнікальнасці Алімпійскіх гульняў, а таксама іх спадчыны. У гэтых мэтах арганізацыйныя камітэты, гарады-арганізатары і нацыянальныя алімпійскія камітэты выкарыстоўваюць прадстаўленую правамі ІУ ахову, а таксама забяспечваюць захаванне сваіх звязаных з ІУ абавязкаў перад трэцімі бакамі.

Дзякуючы сумежным правам, якія ахоўваюць актывы вяшчальных арганізацый, Алімпійскія Гульні трапляюць у дамы гледачоў па ўсім свеце з дапамогай тэлебачання, лічбавых і медыйных платформаў. Вяшчальныя і медыйныя арганізацыі плацяць вялікія сумы за выключнае права на трансляцыю Алімпійскіх гульняў у нашых дамах. Сумежныя правы, якія належаць ім, вельмі важныя, паколькі яны дазваляюць пакрываць выдаткі на трансляцыю гульняў і акупіць інвестыцыі ў гэтую дзейнасць.

Прыбытак, які атрымлівае МАК з дапамогай стратэгічнага выкарыстання права ІУ, пераразмяркоўваецца па ўсім алімпійскім руху на карысць асобных спартсменаў, арганізацыйных камітэтаў, нацыянальных алімпійскіх камітэтаў, міжнародных спартыўных федэрацый і іншых спартыўных арганізацый. Таксама гэтыя сродкі, якія атрымліваюцца з дапамогай ІУ, ідуць на падтрымку спорту ў краінах, якія развіваюцца, і на забеспячэнне таго, каб далучыць да Алімпійскіх гульняў як мага больш людзей.

Па матэрыялах САІУ