Вынаходнікі Беларусі (Валатоўскі Ігар Дзмітрыевіч)

Акадэмік Нацыянальнай акадэміі навук Беларусі, член-карэспандэнт Акадэміі навук, доктар біялагічных навук, прафесар, заслужаны дзеяч навукі Рэспублікі Беларусь, вучоны-біяфізік.

Ігар Дзмітрыевіч Валатоўскі нарадзіўся 25 кастрычніка 1939 г. у Мінску. У 1962 г. скончыў Мінскі медыцынскі інстытут і стаў працаваць у лабараторыі біяфізікі і ізатопаў АН БССР, з 1974 г. – у Інстытуце фотабіялогіі НАН Беларусі. З 1983 г. – намеснік дырэктара па навуковай рабоце, у 1984-1985 гг. – выконваючы абавязкі дырэктара, у 1985-2010 гг. – дырэктар Інстытута біяфізікі і клетачнай інжынерыі НАН Беларусі, адначасова з 1988 г. – прафесар Беларускага дзяржаўнага ўніверсітэта. З 1997 г. – віцэ-прэзідэнт НАН Беларусі.

Сфера навуковых інтарэсаў І.Д. Валатоўскага знаходзілася ў галіне мембраннай біяфізікі, фотабіялогіі, геномікі і пратэёмікі. І.Д. Валатоўскім вывучаны заканамернасці біялагічнага дзеяння святла на ўзроўні мембранных структур раслінных і жывёльных сістэм і сфармулявана канцэпцыя аб структурна-мембранным кантролі фотабіялагічных працэсаў у клетцы на прыкладзе функцыянавання фотарэцэптарнага і фотасінтэтычнага апаратаў, якая атрымала ўсебаковае эксперыментальнае абгрунтаванне ў яго даследаваннях і працах іншых аўтараў і паклала аснову новаму арыгінальнаму кірунку. Распрацаваны ўніверсальныя схемы трансфармацыі ў клетцы слабых фізічных і хімічных сігналаў у біялагічны эфект, які рэалізуецца з удзелам іёнаў кальцыя і цыклічных монануклеатыдаў.

Ігар Дзмітрыевіч Валатоўскі з'яўляецца аўтарам больш за 300 навуковых прац, у тым ліку 4 манаграфій, навучальнага дапаможніка. У 1999 г. Ігару Дзмітрыевічу Валатоўскаму прысвоена званне «Заслужаны дзеяч навукі Рэспублікі Беларусь», у 2002 г. прысуджана прэмія Прэзідэнтаў Акадэмій навук Беларусі, Украіны і Малдовы, у 2009 г. узнагароджаны ордэнам Пашаны.

З базы дадзеных Рэспубліканскай навукова-тэхнічнай бібліятэкі.